جبر الخواطر. بقلم/مروة عرفة

  • تاريخ النشر :
  • عدد المشاهدات : 461 4 5

 

أنا صراحة بحب الطعميه .. فهضرب مثال عليها .. تخيل معايا إنك دخلت المطعم و قولت لصاحُبه لو سمحت عاوز ب 5 جنيه طعميه, ودخل بعدك راجل وقاله عاوز ب 6 طعميه, ف الراجل بتاع المطعم عبي للشخص اللي جه بعدك ونسيك, فقولتله ينفع كده ؟ بقي انا جي قبله وتمشيني بعده ! قام الراجل خبط ضهر إيده علي جبهته وقال آآآآآخ والله أنا اسف جدًا يا أستاذ مخدتش بالي خالص وراح لافف وكان عاوز يبوس راسك وقالك حقك عليا لحظات والطعميه تخرج من الطاسه مفحَفحه تستاهل بُقك .. ساعتها هتحس بإيه ؟ هتحس بإن أسلوبه إمتلكك .. كأنه جاب حبل وشد بيه قلبك من جوه صدرك وحركه ناحية حُبك فيه, وهتقوله ياباشا ولا يهمك خُد راحتك, ومش بعيد تبقي زبون دايم للمحل . الأسلوب ده حاجه كده بتخطف الواحد .. – تعرف إن في بنت ممكن متنامش طول الليل عشان واحده قالتلها إنتي تخنتي وطلعلك كرش ! – طب تخيل ممكن واحد يتغم ونفسه تتسد طول النهار ويفضل يبص لنفسه في المرايا عشان واحد قاله مناخيرك معوجه أو مكعبره .. ساعات بنشوف إن الموضوع مُيستحقش زعل اللي قُدامنا, وإنه مكبر الحكايه .. بس إحنا مُش هو .. عُمرك شوفت واحد بطنه وجعاه فإنت حسيت بالمغص بتاعه ! .. علشان كده النبي قال : خاطبوا الناس علي قدر عقولهم ” وكان يقصد إن مادام مشاعرُه هتنجرح من كلمه مُعينه منقولهاش حتي ولو إحنا شايفنها عادي .. – لو هي هتزعل إن مقولتلهاش مثلاً: كل عام وإنتي طيبه الساعه 12 يوم ميلادها يبقي مفيش مشكله قولها حتي ولو شايف إنه موضوع تافه .. – هيتضايق لو إنت سألته إيه سبب تأخير الخلفه .. أو إنت مُهمل .. خلاص متقلهوش ! أو غير طريقة كلامك معاه .. – هزار بالايد مثلا بيحرج اللي قدامك أو بيضايقه خلاص متهزرش بإيدك عادي .. عندك فكره كام شخص دلوقت نايم وشايل من ناس يعتبروا حته منه لأنهم مبيخلوش بالهم من تصرفاتهم وكلامهم معاه ؟ تعرف كام واحد بيقول في باله أبويا مبيفهمنيش أو أمي مبتحسش بيا ؟ أكيد مفيش أم بتكره عيالها .. بس زي ما الموبايلات بينزلها تحديثات عشان تبقي مُناسبه للوقت والتطورات اللي حواليها .. كذلك؛ الأم .. الصاحب .. الاخ .. الأخت .. الزوج .. الزوجه .. لازم يحدثوا من طريقة كلامهم ويطوروا نفسهم علي حسب اللي قدامهم مفيش حاجه إسمها مُش مستاهله أو تافهه .. العيل الصغير عندنا بياخد مناب قد الكبير, ولو سألت أبويا ليه مياخدش مناب صغير .. هيقولك: قلده .. إعمل زي ما بيعمل بالظبط، يصرخ .. إصرخ .. يجري .. إجري.. يلعب .. إلعب .. هتهمد وتقول إيه ده ؟ ده يستحق ياكل قدي مرتين ! يبقي نُحط نفسنا مكان اللي حوالينا .. نجرب الكلمه علي روحنا الاول؛ ياتري هتجرحنا ولا لاء ؟ طب التصرف الفولاني لو إتعمل معايا هيضايقني ولا إيه ؟ ونقيس بقي علي كل شيء .. الأسلوب هو اللي بيحكم علي جمال الشخص .. الودن بتحب قبل العين، تصرفاتك و كلامك حلو هتبقي حلو حتي ولو شكلك مُش جميل .. من الآخر اللي يمتلك إحساس وأسلوب أحسن 1000 مره من اللي يمتلك قصور وبيوت

الاقسام

تعليقات الفيسبوك

ابحث معنا